أيمن مرجان

التمثيل والأداء

إزاي تبدأ التمثيل من الصفر وانت ما عندكش أي خبرة؟

أيمن مرجان في دور «صانع القبعات» في عرض «أليس في بلاد العجائب»

اقعد. اطلب شاي. وقبل ما نتكلم، جاوبني على سؤال واحد بصراحة: إنت خايف إنك تبدأ متأخر، ولا خايف إنك تبدأ وتكتشف إنك «مش موهوب»؟

لو الإجابة واحدة من الاتنين، فأهلًا بيك. ده نفس الخوف اللي قعد على نفس الكرسي ده قبلك آلاف المرات.

أسطورة «اتولد ممثل»

فيه جملة بتموّت أحلام أكتر من أي حاجة تانية: «الممثل بيتولد ممثل».

بص على الحكايات الحقيقية. عادل إمام دخل كلية الزراعة في جامعة القاهرة، ولقى طريقه للمسرح من فرق الجامعة، مش من خطة مرسومة. هاريسون فورد كان شغال نجّار قبل ما يتعرف، وفضل يشتغل نجارة بين الأدوار الصغيرة سنين. ومورجان فريمان ما عرفهوش الجمهور الواسع غير وهو داخل على الخمسين.

ولا واحد فيهم صحي الصبح لقى نفسه نجم. اللي حصل إنهم فضلوا يشتغلوا. الموهبة زي البذرة: مهمة، آه، بس من غير مية وشمس وصبر بتفضل بذرة في درج.

اللي عندك دلوقتي، الشغف اللي مخليك تقرا الكلام ده، هو المية الأولى. الباقي شغل.

حكايتي أنا مع أول مرة

هقولك سر. أول مرة وقفت فيها على خشبة مسرح كنت مرعوب. مش متوتر وخلاص، مرعوب. والمضحك إن دوري كله كان جملتين، مش أكتر.

الرهبة ما كانتش من الجملتين. كانت من العيون اللي في الضلمة قدامي. ولما جه دوري أخيرًا وفتحت بُقي، كان الجمهور لسه بيصقف لممثل تاني خلّص مشهده قبلي. قلت جملتي والتصفيق شغال، وما حدش سمعها تقريبًا.

بس اللي حصل وقتها علّمني حاجة. جسمي اتكلم بدالي: الانفعال كان باين في كتافي وإيدي ونظرتي، والإحساس وصل حتى والكلمة ضاعت. وفضل الخوف قاعد على صدري لحد التحية في آخر العرض، ساعة ما سمعت تصفيق الناس. هنا بس الخوف راح، واتولد مكانه حاجة تانية خالص.

دور صغير جدًا، وجملتين ما اتسمعوش. ومع ذلك كانوا البداية.

المعهد ولا الشارع؟

سؤال بيتسأل في كل قعدة: «لازم أدخل المعهد العالي للفنون المسرحية علشان أبقى ممثل؟»

الإجابة الصادقة: لأ، بس الدراسة بتختصر عليك سنين.

الدراسة الأكاديمية بتديك حاجات صعب تجمعها لوحدك:

  • أدوات ثابتة: صوت، وتنفس، وحركة، وتحليل نص. دي عضلات بتتبني بالتمرين المنتظم، مش بالإلهام.
  • مسرح تغلط عليه ببلاش: أربع سنين تجرّب وتقع وتقوم قدام أساتذة وزملاء، من غير ما حد يدفع تذكرة.
  • ناس: زمايلك النهارده هم المخرجين والمؤلفين ومديرين الكاستينج بكرة.

بس الشارع والحياة مدرسة بجد، بشرط إنك تبقى تلميذ صاحي. اقعد في المواصلات وراقب: الست اللي بتتكلم في التليفون بصوت واطي ووشها بيقول عكس كلامها، والراجل اللي بيضحك وإيده متشنجة على الشنطة. ده كله «تمثيل» حقيقي. ستانيسلافسكي، أبو المناهج الحديثة في التمثيل، كان شايف إن الممثل لازم يحب الفن اللي جواه، مش يحب نفسه في الفن. والفن ده بيتغذى من الملاحظة.

يعني: لو تقدر تدرس، ادرس. لو مش هتقدر دلوقتي، ابدأ من اللي في إيدك، ومتسيبش ده يبقى حجة إنك تقف.

ورشة بجد ولا «سبوبة»؟

هنا لازم نتكلم بصراحة شوية، لأن الحتة دي بيتسرق فيها فلوس وأحلام.

علامات الورشة اللي تهرب منها

  • بتوعدك بدور: «احجز معانا وهتطلع في مسلسل رمضان». محدش يقدر يضمن لك دور. أي ورشة بتبيعلك الضمان ده بتبيعلك وهم.
  • المدرب ما لوش شغل تقدر تشوفه: اسأل عن أعماله واتفرج عليها بنفسك. لو الإجابة كلها «اشتغلت مع ناس كبار» من غير أسماء ولا روابط، اسحب نفسك بالراحة.
  • فصل فيه أربعين واحد: إنت رايح تتمرن، مش تتفرج. لو مش هتقف وتشتغل قدام المدرب في كل حصة تقريبًا، يبقى إنت دافع تمن محاضرة.
  • تصوير مدفوع إجباري: «لازم تعمل سيشن تصوير معانا بمبلغ كذا علشان نبعتك للكاستينج». ده بيزنس، مش تدريب.

علامات الورشة اللي تستاهل

  • عدد صغير، تقريبًا من 10 لـ 15 واحد.
  • شغل على مشاهد ونصوص حقيقية، مش ألعاب وتمارين طاقة بس.
  • مدرب بيديك ملاحظات محددة: «إيدك هربت هنا»، «إنت مستعجل على الجملة دي»، مش «حلو يا حبيبي كمّل».
  • خريجين تقدر تكلّمهم وتسألهم بنفسك.

نصيحة على الماشي: اطلب تحضر حصة واحدة قبل ما تدفع. الورشة المحترمة مش هتخاف من الطلب ده.

أول شوريل من أوضتك

دلوقتي الكاستينج في الدنيا كلها بقى بيعتمد على الـ Self-tape، يعني فيديو بتصوّره بنفسك وتبعته. يعني موبايلك ده بقى استوديو حقيقي لو عرفت تستخدمه.

المعدات (أغلبها عندك)

  • الموبايل: ثبّته في مستوى عينيك، وصوّر بالعرض.
  • الإضاءة: شبّاك قدامك، مش وراك. نور النهار الطبيعي أحسن من أي لمبة.
  • الخلفية: حيطة سادة. شيل البوسترات والدولاب المفتوح.
  • الصوت: أهم من الصورة. اقفل المروحة، وعلّق بطانية على الباب لو الأوضة بترن. ولو تقدر تجيب مايك صغير بيتشبك في الهدوم، هيفرق جدًا.

المحتوى

  • مشهدين بس، مختلفين عن بعض: واحد فيه هدوء وواحد فيه انفعال، أو واحد درامي وواحد خفيف. الهدف إنك توري مساحتك.
  • المدة: دقيقة لدقيقة ونص. محدش هيتفرج على عشر دقايق.
  • أول عشر ثواني: حط فيهم أقوى لحظة عندك. مدير الكاستينج ممكن يقرر من هنا.
  • من غير موسيقى فوق الكلام، ومن غير مونتاج «تريلر»: الناس عايزة تشوفك إنت.
  • في الآخر: اسمك ورقم أو إيميل للتواصل، وارفعه على يوتيوب.

بعد ما تخلّص، اتفرج عليه من غير صوت. لو وشّك لوحده قادر يحكي اللي بيحصل، يبقى ماشي صح. وبعدها اتفرج بالصوت ومن غير ما تبص على الشاشة. لو الصوت لوحده موصّل الإحساس، يبقى عندك شوريل بجد.

الكاميرا مش عدوّك

الغريبة إن أول مرة وقفت فيها قدام الكاميرا ما كانش فيها ولا ذرة من رعب المسرح. بالعكس، حسيت بمتعة حلوة من أول يوم، وعرفت إني بحب الوقفة دي، زي ما اتعلمت بعد كده أحب وقفة المسرح.

حلاوة المسرح إنه لحظة حيّة: بتحصل مرة واحدة قدام ناس بتتنفس معاك، ومفيش «إعادة». الكاميرا أرحم شوية، تقدر تعيد المشهد بسهولة. بس أحلى حاجة وصلتلها مع السنين مش إني بقيت أعيد أقل. أحلى حاجة إني بقيت أسيب نفسي قدام الكاميرا كأنها مش موجودة، بالظبط زي ما بتنسى الجمهور وانت على الخشبة، وتعيش اللحظة وتستمتع باللي بتقدمه.

وده بالظبط اللي عايزك تتمرن عليه وانت بتصوّر شوريل أوضتك: انسَ الموبايل، وعيش المشهد.

آخر الكلام

سانفورد مايزنر، واحد من أهم مدرّسي التمثيل في القرن العشرين، عرّف التمثيل بإنه «إنك تعيش بصدق في ظروف متخيَّلة». خلي بالك من الكلمة: «بصدق». مش بإبهار، ولا بصوت عالي، ولا بشكل حلو.

ابدأ النهارده بحاجة صغيرة: اختار مونولوج، احفظه، صوّره، واتفرج عليه. هتتكسف من نفسك، وده طبيعي. المرة العاشرة هتبقى أحسن، والمرة المية هتبقى ممثل.

وفي المقال الجاي هنتكلم عن الصوت والتنفس: السر اللي بيخلي جملة عادية تخبط في قلب اللي قاعد في آخر صف.


مراجع للاستزادة:

  • قسطنطين ستانيسلافسكي، حياتي في الفن (My Life in Art).
  • Sanford Meisner & Dennis Longwell, Sanford Meisner on Acting, Vintage Books, 1987.

لو عايز تشوف الكلام ده على أرض الواقع، اتفرج على أعمالي في التمثيل أو قائمة كل الأعمال.

Let’s make the next scene

للتعاون الفني والعروض